Ek baar ke liye aisa laga,

Maano aasman sir pe aa gira,

Pairon ke neeche dharti phat gayi.

Ek baar ke liye aisa laga,

Saanse chal rahi thi meri, par

Jaise dil ki dhadkan band ho gayi.

Ek baar ke liye aisa laga,

Sab taraf roshni hai, par

Phir bhi kuchh dikh nahi raha.

Ek baar ke liye aisa laga,

Raasta saaf tha magar, ekdum se

Usme kaante ug gaye.

Ek baar ke liye aisa laga,

Bagiya mein kali, khili

Nahi ki murjha gayi.

Ek baar ke liye aisa laga,

Badal mein bijli kadki, aur

Mere badan pe aa giri.

Ek baar ke liye aisa laga,

Maine kuchh kiya hi nahi, phir bhi

Mujhse galti ho gayee.

Ek baar ke liye aisa laga,

Meri vajah se usko, na jaane

Kaun kaun se dard mile.

Ek baar ke liye aisa laga,

Mera yaar mujhse bichhad gaya,

Par aisa hua nahi...

Aisa ho hi nahi sakta...

Wo itni gehri neend mein so rahi hain,

Hum unhe dekhkar hi raat bita lenge,

Mann to karta hain unko jagaye chutki katkar,

Par dil ke armaan  zara sabr kar lenge.

Na jaan, na pehchaan, hum tumhare mehmaan,

Mehfil khub sajayi hai tumne mezbaan.

Pata nahi tha aap samjhenge ki kam hui aapki shaan,

Dil kyun toda, le lete hamare pran.

Abhi to mile the, abhi to aapko jaana bhi nahi,

Pata hi nahi chala, kab pyar ho gaya.

Par kismat bhi dekho, kya ajeeb khel khelti hai,

Mera humsafar na jaane kahan kho gaya.

Kai baar aankhein dokha kha jaati hain,

Mann kuchh kehta hai, dil kuchh aur,

Tumse to sirf kuchh pal maange the,

Par dil par kahan chalta hai kisi ka zor.

Ek chhoti si bhul ki, itni badi sazaa,

Na dete, to kya pata kya sama hota,

Aaj saath saath hote, duur hi sahi,

Par mann aur dil ka khwab ek hi hota.

Aap jab se aaye meri duniya mein,

Sab badal gaya.

Dosti yaari, ghar khandaan,

Main sab bhool gaya.

Woh kehte hai na,

Jo hota hai achchhe ke liye hota hai,

Aapse kabhi guftagu to na hui, par

Main shayar ban gaya.

Usse ghanto baat karta hun,

Phir bhi lagta hai baat hi nahi hui,

Uske saare raaz jaanta hun,

Phir bhi shayad use jaanta hi nahi.

Uske saath bitaye lamhe mujhe hamesha rahenge yaad,

Dua hai uske chehre pe rahe muskaan saalo saal.

Wo hai mere bachpan ki yaar,

Usse main aaj bhi karta hun pyaar.

Yun pedon ke peechhe se chhup chhup ke na dekho ae chand,

Patton ke beech se aa rahi hai chandni.

Doston ke saath hi baitha hun,

Saamne aao gar chah hai milne ki!

Is char diwari mein kaid rakha hai apne aap ko,

Aur kehte ho hum azaad hain.

Roz khabren padhte ho doosron ke likkhe hue,

Aur kehte ho hum azaad hain.

Laakhon ka dil churaye baithe ho,

Aur kehte ho humara dil azaad hai...

Galat na samajhna, shabdon ka khel hai ye,

Kam se kam humara likhna azaad hai.

Har pal samay badh raha hai,
Dharti ghoom rahi hai, suraj jal raha hai,
Kaise rakhe kuchh bhi kaabu mein,
Zamane mein sab badal raha hai.

Jo ho shikve gile, sab bhula do,

Chhod ke saare garaj, gale milo,

Chahe maut ko dhoka de do, 

Par jaane ki zidd na karo.

Zindagi khul ke jiyo,

Sada muskurate raho,

Sab gam duur ho jayenge,

Khush rehna to seekho.

Mann ki baat mann mein mat rakkho,

Jis jis se kehna hai, jaao keh do,

Jisse na milna chaho, usse bhi milo,

Kya pata phir, kal ho na ho.

Q: Hai andheri raat magar, diya jalana kab mana hai?

A:

Diya jalaoge to aandhi aayegi,

Batti jalaoge, light chali jayegi,

Woh chand bhi chhup jayega badalon ke peeche,

Roshni to sirf aapke chehre se aayegi.